Benjamin

Ich bin dä Benjamin und bi än 87er, han blaui Auge und bruni Haar. Ich schaffe gern mit Computer und verstah sie au einigermasse... Natürlich spiel ich au gern druf. Nei i Würklichkeit bin ich gar nüm so viel am Comp. Ich han nämli gar nöd so vill Ziit :-( . Ich bin au gern veruss, z.B. am Basketball oder Fussball spielä. Oder im Summer am Schwümmä und Wakeboarde.

Im Winter bin ich am Snowboarde und zwar in Klosters. Ich bin immer uf dä Suächi nach dä gröschtä Schanzä oder em gröschte unbefahrene Tüüfschneefeld. Au i dä Halfpipe bin ich scho gsi, aber für diä mus ich halt uf Davos ufä. Wie du gsesch, so als Freestyler und Freerider hät mes gar nöd so eifach.

Ich gang z'Züri is MNG. :-o das isch's Mathematisch-Naturwüsseschaftliche Gymi Rämibühl. Zersch mal isch mis Ziel d'Matur bestah und nachher gan ich wahrschinli go studiere aber was ich später mal wott mache weiss ich nanig...

Ich han ganzi 5 Jahr Klavier gspillt :-o aber ich han im Summer 2000 dänn doch ufghört. Defür han ich i de Sportferie 2003 agfange Gitarre spille und han das als Matura Instrument. I de Freiziit wo mir nebät äm Gymi bliibt los ich gern Musig vo Red Hot Chilli Peppers, Freak Power, Led Zeppelin und susch na villne anderne.

I dä Pfadi bin ich jetzt sit dä Pfingste 02 Führer im Stamm Bodega. Und jetzt han ich jede Ziischtig Abig Höck! Ich freu mich mega dass ich das mache chan und ich han vill Schpass amigs a de Samschtig Namittäg und i de Lager während dä Ferie!

Lebenslauf