Mis gröschte Hobby isch eidütig Schlagzüg schpiele. Das mach i praktisch jede Tag. Ich schpiel i dä Jugendmusik unterer rechter Zürichsee. Det bin i scho sit ich agfange han mit Schlagzüg schpiele däbii. Sit dä 2. Klass, also doch scho einigi Jahr. Vor 4 oder 5 Jahr händ mir det na ä Percussionsgruppe bildet (Gruess a alli DRUMFREAX). Das heisst, mir schpieled eifach immer am Jahreskonzert vo dä Musik na zwei drü Schtuck ällei (und händ meischtens dä gröscht Applaus :-)) Mir händ au scho sälber Uftritt gha. Dä gröscht Erfolg isch gsi, womer zum Jubiläum vo dä Partnermusik vo Erlebach (CH) uf Erlenbach am Main (DE) sind.

Dänn schpiel ich na inere Band. Mir sind 5 Lüt. Dä Osi am Keyboard, dä Rohner a dä Gitarre, dä Janik isch dä Sänger (schpielt au na Saxophon..) und dä Brüno am Bass!!! Mir heissed Project Pacifier und mached Sound so im Schtiil vo 3 Doors Down... Mir händ mittlerwile knapp 20 Lieder, immer wieder mal es Konzert und sogar ä erschti CD. Falls du na me wüsse wetsch gah doch uf eusi Page.

Sit äm Früelig 2003 schpiel ich au na bi dä Tambure vo dä UBS. Das isch ächt cool.

Snowboarde chunt grad nach Schlagzüg schpiele. Ich fahr jetzt die 9. Saison und es macht mer jedes Jahr meh Schpass! Am liebschte fahr ich näbet dä Piste. Aber kei Angscht ich han zwei Freeride Kürs genosse, ich chumm scho nöd unter ä Lawine ;-)

Süsch verbring ich viil Ziit vor äm Computer. Ich schaffä, surfe, chatte und schpile. Im Summer bin ich entweder am Bade, Wakeboarde oder am Fussball schpiele. Ich los au gern Musik vo dä Aerzte, 3 Doors Down, Millencolin, Apocalyptica, Offspring, Metallica, Sum41, Bad Religion und viili viili meh... ;-)

Ah ja, han i ganz vergässe, i dä Cevi bin ich au na, au scho sit öpä 12 Jahr, oder so. Und ich "freu" mich au jedes Mal wänn ich am Mittwuch wieder ä mal an Höck derf zum mir wieder äs Programm für dä Samschtig zu dä Finger us z'sugä. Aber äs sind wenigschtens alli nett und mir händs immer luschtig. Gäll Grizzuu!!!!!

Uebrigens, mini ICQ Nummere isch 88959222, tuen mich doch eifach uf dini Lischte wännd mal mit mir wotsch chatte.

Lebenslauf

» Home